Pavajennaje raźvićcio padziejaŭ i hieahrafičnaje stanovišča dapamahło Vienie zavajavać hety tytuł.
Padobna da Bierlina, paśla druhoj suśvietnaj Viena (jak i ŭsia Aŭstryja) była padzielenaja na brytanskuju, francuzskuju, amierykanskuju i savieckuju akupacyjnyja zony. Byłyja nacysty, zhaładałyja miascovyja žychary i ŭciekačy z Uschodniaj Jeŭropy, namahajučysia vyžyć u pavajennym biezhrašoŭi, sprabavali pradać kaštoŭnyja viedy lubomu, chto moh zapłacić. Špijonskaje žyćcio, poŭnaje intryh i vierbovak, u Vienie bujała.
Paśla vyvadu savieckich vojskaŭ u 1955 h., u Vienie zastałosia vializnaje savieckaje pasolstva, napakavanaje supracoŭnikami KDB i HRU (savieckaj vajskovaj vyviedki). U tyja hady CRU paviedamlała, što amal kožny, chto byŭ abvinavačany ŭ špijanažy na karyść SSSR, choć raz dy jeździŭ u Vienu na sustrečy sa śpiecsłužbami. Savieckija dypłamaty, jakija pracavali ŭ Vienie ŭ 70‑ia i paśla ŭciakli na Zachad, havaryli pra dobra naładžanuju špijonskuju sietku ŭ aŭstryjskaj stalicy. Siarod ich — były ahient HRU Viktar Suvoraŭ, jaki ŭ svaich bieletryzavanych uspaminach «Akvaryum», vydadzienych na Zachadzie, padrabiazna apisaŭ, jak jaho vučyli sychodzić ad sačeńnia ŭ aŭstryjskaj stalicy. Pa słovach Suvorava,
kala 80% usich savieckich hramadzianaŭ u Vienie (handlovyja pracaŭniki, navukoŭcy, pradstaŭniki «Aerafłota» i vialikaja kolkaść dypłamataŭ), akramia svaich niepasrednych abaviazkaŭ, vykonvali «inšuju pracu».
Bolšaść zadańniaŭ, zhodna z Suvoravym, była sfakusavanaja na prydbańni zachodnich technałohijaŭ.
Chałodnaja vajna skončyłasia dva dziesiacihodździ tamu, a Viena dahetul zastajecca mahnitam dla špijonaŭ. Adnym z samych hučnych złačynstvaŭ apošniaha času, za jakimi prahladajucca ślady dziejnaści śpiecsłužbaŭ, było zabojstva čačenskaha dysidenta Ŭmara Israiłava, jaki byŭ zastreleny pasiarod biełaha dnia napačatku 2009 h. u Vienie. Aŭstryjskaja palicyja zatrymała troch čałaviek, jakija padazrajucca ŭ arhanizacyi zamachu: dvuch čačencaŭ i adnaho aŭstryjca na proźvišča Kaltenbruner, jaki byŭ narodžany ŭ SSSR.
U 2008 h. była ździejśnienaja sproba vykradańnia byłoha kiraŭnika śpiecsłužbaŭ Kazachstana Alnura Musajeva, ekstradycyi jakoha daŭno damahajecca režym Nursułtana Nazarbajeva. I Israiłaŭ, i Musajeŭ žyli ŭ Vienie ŭ vyhnańni. Pavodle rasijskaj redakcyi radyjo «Svaboda»,
u Vienie dziejničajuć nie mienš za 500 ahientaŭ FSB, jaki sočać za šmattysiačnaj čačenskaj dyjasparaj, jakaja prybyła ŭ Aŭstryju ŭ apošnija hady.
«Aŭstryja pa‑raniejšamu ŭlubionaje miesca dla ahientaŭ, — kaža Zyhfryd Biejer, kiraŭnik Aŭstryjskaha centra pa pytańniach vyviedki, teraryzmu i biaśpieki pry ŭniviersitecie horadu Hrac. — Ułady, jak praviła, viedajuć pra ich, ale ŭmiešvajucca zredku… Heta takaja daŭniaja zaviadzionka». Da taho ž, ličycca, što ŭ Vienie «dosyć lohka zdabyć zbroju i admyvać hrošy». Nie zabudziemsia i na hieahrafičnaje stanovišča Vieny, jakaja znachodzicca na skryžavańni jeŭrapiejskich šlachoŭ — usiaho 56 km da stalicy Słavakii Bratysłavy i jakaja hadzina jazdy ad vienhierskaj miažy.
