Fota: AP Photo/Mary Altaffer, File
Sud u Ńju-Jorku ŭ čaćvier prysudziŭ byłoha pradprymalnika Sema Benkmana-Fryda da 25 hadoŭ turmy pa spravie ab kradziažy vaśmi miljardaŭ dalaraŭ u klijentaŭ zasnavanaj im i paźniej zbankrutavaŭšaj kryptavalutnaj biržy FTX, piša Bi-bi-si.
Paśla dvuchhadzinnaha słuchańnia ŭ sudzie Manchetena akruhovy sudździa Ljuis Kapłan adchiliŭ śćviardžeńni Benkmana-Fryda ab tym, što klijenty jaho biržy nibyta nie panieśli nijakich strat, i pastanaviŭ, što jaho dziejańni byli złačynnymi. Kapłan taksama źviarnuŭ uvahu na toje, što Benkman-Fryd nie raskajaŭsia ŭ zroblenym.
U vyniku 32-hadovaha byłoha miljardera pryznali vinavatym u machlarstvie, jakoje ciapier nazyvajuć adnym z najbujniejšych u historyi ZŠA. Kryptavalutnaja birža FTX była acenienaja ŭ 32 młrd dalaraŭ, pierš čym jana zbankrutavała ŭ 2022 hodzie.
«Jon viedaŭ, što ździejśniŭ złačynstva, — zajaviŭ Kapłan pierad tym, jak vynieści prysud. — Jon viedaŭ, što jon złačyniec. Jon škaduje, što praličyŭsia, kali zrabiŭ staŭku na toje, što heta sydzie jamu z ruk. Ale jon nie źbirajecca ni ŭ čym pryznavacca, i heta jaho prava».
Benkman-Fryd, jaki prybyŭ u budynak suda ŭ turemnaj bežavaj futbołcy, paćvierdziŭ, što klijenty biržy FTX na samaj spravie paciarpieli, i navat prynios prabačeńni svaim byłym kaleham pa pracy, adnak svajoj viny nie pryznaŭ. Jon źbirajecca abskardzić prysud.
«Jaho naŭmysnaja i biaskoncaja chłuśnia prademanstravała nachabnaje hrebavańnie čakańniami klijentaŭ i niepavahu da viaršenstva zakona», — adznačyŭ u svajoj zajavie prakuror Manchetena Demijan Uiljams.
Jak zajaviŭ sudździa Kapłan, klijenty FTX stracili 8 młrd dalaraŭ, inviestary, jakija ŭkłalisia ŭ akcyi FTX — 1,7 młrd, a kredytory chiedž-fondu Alameda Research, zasnavanaha Benkmanam-Frydam, pazbavilisia jašče 1,3 młrd.
Sudździa taksama zajaviŭ, što Benkman-Fryd schłusiŭ padčas davańnia pakazańniaŭ, kali skazaŭ, što nie viedaŭ, što jaho chiedž-fond patraciŭ depazity klijentaŭ, uziatyja ŭ FTX.
Fiederalnyja prakurory damahalisia turemnaha źniavoleńnia terminam ad 40 da 50 hadoŭ. Adnak advakat Benkmana-Fryda Mark Mukasiej nastojvaŭ, što bolš darečnym było b pakarańnie ŭ vyhladzie pazbaŭleńnia voli na piać ź nievialikim hadoŭ.
«Klijenty paciarpieli, i ja zusim nie chacieŭ pieramienšyć značeńnie hetaha. Mnie zdajecca, ja niedastatkova skazaŭ pra heta padčas pracesu, i chaču za heta paprasić prabačeńnia», — zajaviŭ na sudzie Benkman-Fryd.
«Jany ŭkłali ŭ heta šmat sił, a ja ŭsio heta vykinuŭ na viecier, i heta ciśnie mianie kožny dzień», — skazaŭ jon nakont svaich kalehaŭ pa biržy.
Troje byłych kalehaŭ miljardera, vystupajučy ŭ sudzie ŭ jakaści śviedak, zajavili, što jon daručyŭ im vykarystoŭvać srodki klijentaŭ FTX dla pakryćcia strat Alameda Research. Usie troje pryznali siabie vinavatymi ŭ machlarstvie.
Padčas słuchańnia advakat Mukasiej pastaraŭsia zrabić usio, kab jaho padabaronnaha nie stavili ŭ adzin šerah z takimi sumna viadomymi ašukancami, jak Biernard Medaf.
«Sem nie byŭ biaźlitasnym sieryjnym zabojcam finansavaha śvietu, jaki kožnuju ranicu adpraŭlaŭsia pryčyniać škodu ludziam», — skazaŭ Mukasiej, acharaktaryzavaŭšy svajho klijenta jak «niedarečnaha batana-matematyka», jaki ŭparta pracavaŭ nad tym, kab viarnuć klijentam hrošy paśla krachu FTX.
Sam Benkman-Fryd u svaju abaronu zajaviŭ, što nasamreč dapuściŭ šerah pamyłak, u pryvatnaści, nie stvaryŭ śpiecyjalny adździeł pa kiravańni ryzykami, ale pry hetym jon kateharyčna admaŭlaŭ, što mieŭ namier kaho-niebudź padmanuć abo skraści hrošy klijentaŭ.
Vypusknik Masačusieckaha technałahičnaha instytuta, Benkman-Fryd padčas bumu kryptavalut, pa danych časopisa Forbes, zarabiŭ 26 młrd dalaraŭ, kali jamu nie było i 30.
Jon byŭ viernym paśladoŭnikam ruchu efiektyŭnaha altruizmu, jaki zaachvočvaje talenavitych maładych ludziej zarablać šmat hrošaj i addavać ich na dabračynnyja mety.
Jon taksama byŭ adnym z najbujniejšych donaraŭ Demakratyčnaj partyi ZŠA.
Adnak, pa słovach prakuroraŭ, kultyvavany im imidž adkaznaha čałavieka byŭ zaklikany chavać šmathadovy kradziež srodkaŭ klijentaŭ.
Čytajcie taksama:
Jak nabyvać kryptavaluty — padrabiazny hajd
U 16-hadovaha kryptavalutčyka ź Viciebska chočuć kanfiskavać 460 tysiač rubloŭ
U žychara Lozna chočuć kanfiskavać 400 tysiač rubloŭ, zaroblenych na kryptavalutach
