 Эмануіл Зэльцэр |
Нота стала адказам на адозвы Дзярждэпартамента ЗША (25 красавіка і 19 мая), у якіх утрымліваліся просьбы вызваліць Зельцэра «з меркаванняў гуманнасці», бо, на думку амерыканскага боку, стан яго здароўя пагоршыўся падчас зняволення.
Між іншым, як паведамілі ў прэс‑службе пасольства ЗША, «у сувязі з сур\’ёзная занепакоенасцю станам Зельцэра МЗС Беларусі дазволіла яго абследаванне незалежным урачом, які будзе названы амерыканскім дыппрадстаўніцтвам».
Прадстаўнікі дыпмісіі ЗША таксама атрымалі магчымасць зноў сустрэцца з арыштаваным 2 чэрвеня. Каб атрымаць дазвол, спатрэбілася больш за месяц, удакладнілі ў пасольстве ЗША. Сустрэча стала трэцяй з моманту затрымання амерыканца: консул ЗША таксама наведваў Э.Зельцэра ў следчым ізалятары КДБ 27 сакавіка і 25 красавіка.
Пасольства ЗША «рашуча заклікала беларускія ўлады неадкладна дазволіць Зельцэру прыём лекаў, неабходных для паляпшэння яго стану».
У МЗС Беларусі адмовіліся даць БелаПАН інфармацыю аб рашэнні беларускага боку.
Паводле звестак КДБ Беларусі, урачэбная камісія пастанавіла, што стан здароўя дазваляе Зельцэру ўтрымлівацца ва ўмовах следчага ізалятара.
Э.Зельцэр разам з сакратаром Уладленай Функ былі затрыманы 12 сакавіка ў Мінску. Яны абвінавачваюцца ў выкарыстанні заведама фальшывых дакументаў групай асоб. Падрабязнасці арышту афіцыйна не каментуюцца, таму што справа мае статус дзяржаўнай тайны.
27 мая ў дачыненні да Э.Зельцэра была распачата справа на падставе ч. 1 арт. 328 (незаконная перавозка і захоўванне наркатычных сродкаў) і ч. 2 арт. 228 (кантрабанда наркатычных сродкаў) Крымінальнага кодэкса. Згодна з правіламі, пры ўездзе ў Беларусь яму неабходна было ўказаць свае лекі ў мытнай дэкларацыі. Гэтая справа не мае статусу дзяржаўнай тайны, паведаміў адвакат падазронага Дзмітрый Гарачка.
Э.Зельцэр — адвакат грамадзяніна ЗША Джозефа Кея, які з\’яўляецца далёкім сваяком грузінскага бізнесмена Бадры Патаркацышвілі. Пасля смерці 13 лютага Патаркацышвілі Дж.Кей паказаў дакументы, згодна з якімі ён прызначаны выканаўцам тэстаменту памерлага. Дакументы былі складзены Э.Зельцэрам, аднак сваякі Патаркацышвілі аб\’явілі іх падробкай, пасля чаго Зельцэр быў арыштаваны ў Мінску. 13 мая суд Тбілісі прызнаў Кея выканаўцам тэстаменту, пацвердзіўшы тым самым сапраўднасць дакументаў.
