Прадстаўніцы грамадзянскай ініцыятывы «Маці-328», якая аб'ядноўвае сваякоў асуджаных за нарказлачынствы, спрабавалі запісацца на прыём да Наталлі Качанавай, але атрымалі жорсткую адмову.
Качанава ў сярэдзіне красавіка анансавала асабісты прыём грамадзян у Мінску і Жлобіне. Для таго, каб патрапіць на прыём у першых чыслах траўня, неабходна было папярэдне запісацца. Тэлефоны для рэгістрацыі пры гэтым працавалі толькі чатыры гадзіны на дзень.
Тым не менш актывістам удалося арганізаваць дзяжурства і запісацца ў Мінск і Жлобін. Спачатку ім у добразычлівай манеры сказалі, што заяўкі прыняты і ім ператэлефануюць, каб удакладніць колькасць людзей.
Аднак неўзабаве па неафіцыйных каналах актывісткам «Маці-328» далі зразумець, што «Наталля Качанава раздражнёная тэмай, а ўлады больш не маюць намеру абмяркоўваць непрапарцыйна вялікія тэрміны для непаўналетніх і іншыя праблемы асуджаных за нарказлачынствы».
У выніку ніякага званка ад памочнікаў Качанавай не было. Акрамя таго, пры спробе апублікаваць петыцыю на спецыялізаваным сайце, ініцыятыва атрымала адмову ад мадэратараў.
Чытайце таксама:
Качанава падзялілася перадавымі методыкамі змагання з інтэрнэтам
Нашто Абельская пайшла ў сенатары? Распыталі яе інфармаваных калег
