Padrabiaznaściaŭ pakul vielmi mała. Papiarednie viadoma, što jon vypaŭ z 9-ha paviercha ŭ internacie niepadalok ad pryvatnaha doma, u jakim jon žyŭ z maci-pensijanierkaj.
Ciapier u domie Humieniukoŭ znachodzicca milicyja.
Maci Humieniuka miarkuje, što heta było zabojstva. Milicyja papiarednie schilajecca da viersii samahubstva.
Humianiuk pracavaŭ na Biełaruskuju redakcyju Polskaha radyjo. Słuchačam jon byŭ viadomy pad psieŭdanimam Vacłaŭ Halimski. Prahramy jahonaha aŭtarstva išli taksama na niezaležnym radyjo «Racyja», što nadaje z Polščy.
Humianiuk žyŭ ekstravahantnym, bahiemnym žyćciom, apranaŭsia jak dendzi.
Jak paet, 43-hadovy Jury Humianiuk pisaŭ u śpiecyfičnaj dekadenckaj maniery. Jaho zachaplała stylistyka i estetyka mižvajennaha času. Humianiuk byŭ jarkim aŭtaram z hrupy haradzienskich madernistaŭ 90-ch. Na 90-ja prypaŭ i pik jahonaj tvorčaj aktyŭnaści.
***
Jury Humianiuk naradziŭsia 24 vieraśnia 1969 hoda ŭ Hrodnie. Drukavaŭsia ad 1990 h. Skončyŭ adździaleńnie pałanistyki Hrodzienskaha dziaržaŭnaha univiersiteta imia Janki Kupały (1994). Tam ža vučyŭsia ŭ aśpirantury. Na hrodzienskim abłasnym radyjo rychtavaŭ litaraturna-mastacki radyjočasopis «Kantekst» (1991–1994). Pracavaŭ žurnalistam u hazetach «Pahonia» (1992, 1995–2001) i «Dień» (2004), zahadčykam litaraturnaj častki Haradzienskaha abłasnoha teatra lalek (1994–2000). Z 2002 hodu — publicyst biełastockaha miesiačnika «Czasopis». Vydaŭ zborniki vieršaŭ «Vodar cieła» (1992), «Tvar Tutanchamona» (1994), «Rytuał» (1999), «Labirynty pryvidnaha zamku» (2000, u suaŭtarstvie), «Vulica tyhrovych archidejaŭ» (2003). Aŭtar niaskončanaha ramana «Apostały nirvany» (kn. pieršaja 1995), pastaŭlenych u Hrodzienskim teatry lalek pjesaŭ dla dziaciej «Bal u barona Miunchaŭziena» (1993), «Tajamnica załatoha piarścionku» (1998), «Kaladnaje padarožža» (1999), dakumientalnaj sahi «Pryvid daŭnich Kresaŭ» (2004–2005), šerahu krytyčnych artykułaŭ pra litaraturu, vyjaŭlenčaje mastactva i teatar. Suredaktar litaraturna-mastackaha almanacha «Kałośsie». Biełaruskija rok-hurty «Hrunvald», «Ajša» (Jungle X-mas), a taksama asobnyja vykanaŭcy stvaryli na teksty Juryja Humieniuka kala dvuch dziasiatkaŭ piesień.
nn.by
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
