U Sankt‑Pieciarburhu 2 listapada 2007 h. pamierła paetesa Aŭhińnia Kavaluk.
Jašče zusim niadaŭna, na Kalady 2005 h., na kvatery Aŭhińni Trafimaŭny Biełaruskaje hramadska‑kulturnaje tavarystva vinšavała jaje adrazu z tryma vydadzienymi za hod knihami.
Naradziłasia Aŭhińnia Trafimaŭna Sidarovič 13 03 1934 h. u vioscy Stralcy Skidzielskaha rajonu. Skončyła Hrodzienskuju škołu № 9, potym u Hrodnie ž — piedahahičny instytut imia Janki Kupały. Dvaccać try hady pracavała ŭ Ryzie nastaŭnicaj u mižhalinovym vučyliščy pavyšeńnia kvalivikacyi rabotnikaŭ narodnaj haspadarki. Pisała vieršy. Prafiesar Hrodzienskaha univiersitetu Alaksiej Piatkievič adnoj ź pieršych uklučyŭ jaje ŭ svoj encykłapiedyčny daviednik «Słavutyja ludzi Hrodzienščyny». Z 1987 h. žyła ŭ Pieciarburhu, pracavała nastaŭnicaj, aktyŭna ŭdzielničała ŭ kulturnym žyćci Paŭnočnaj stalicy.
U sakaviku 2004 hodu biełaruskaja hramadskaść horadu ŭračysta śviatkavała jaje 70‑hodździe ŭ «Novym domie kultury» na Isakijeŭskaj płoščy. Nastalhiju pa Radzimie jana ŭmieła pieratvaryć u radaść uspaminaŭ. Vieršy dla dziaciej mahła z adnolkavaj paetyčnaściu zapisać pa‑biełarusku, rusku, polsku i niamiecku, a knihu paezii «Słova žančyny da Ajčyny. Vianok sanetaŭ» zrabiła fiłasofskim razvažańniem ab pieršych dziesiaci hadach pierabudovy. Śviet prychodzić i śviet adychodzić, a ziamla prabyvaje. Paezija Aŭhińni Trafimaŭny zastaniecca. Samoj jaje budzie mocna nie chapać.
