 |
U «Našu Nivu» źviarnuŭsia pacyjent Respublikanskaj tuberkuloznaj balnicy «Navajelnia» (Dziatłaŭski rajon, Haradzienščyna)
Siarhiej Voranaŭ. Pa jaho słovach siońnia na śniadanak nia vyjšła kala 150 chvorych. Pacyjenty niezadavolenyja ŭmovami znachodžańnia ŭ balnicy.
«U pałatach syra i chałodna — kala 14‑15 hradusaŭ vyšej za nul, brudna — na pieršym paviersie ścieny čornyja, kormiać aby jak» — raspavioŭ sp. Voranaŭ.
Pavodle jaho, u duš chvorych vodziać dva razy na tydzień, haračaja vada byvaje pierad pryjomam ježy — try razy na dzień. Da ŭsiaho terytoryju balnicy abnieśli trochmetrovym płotam:
«Nas nie vypuskajuć u pasiołak, niama dzie hulać, a my, miž inšym, znachodzimsia tut dobraachvotna».
Chvoryja sabrali podpisy z patrabavańniami i pieradali jaho hałoŭnamu ŭraču Miečysłavu Doŭhalu.
Spadar Doŭhal paćvierdziŭ infarmacyju pra haładoŭku:
«Tak, peŭnaja častka pacyjentaŭ siońnia admoviłasia iści na śniadanak».
Urač paviedamiŭ, što zhodna z praviłami ŭnutranaha rasparadku chvorym zabaroniena pakidać terytoryju balnicy.
«Heta źviazana sa skarhami miascovaha nasielnictva — było sabrana kala 500 podpisaŭ i jašče źbirajuć» — patłumačyŭ sp. Doŭhal.
Pa jaho słovach, kiraŭnictva RTB vykonvaje rasparadžeńnie Ministerstva achovy zdaroŭja, i kožnamu pacyjentu pry pastupleńni na lačeńnie paviedamlajecca pra hetaje abmiežavańnie, i toj padpisvaje adpaviedny dakument.
«Astatnija ich narakańni nieabhruntavanyja i vyklikanyja tolki tym, što im nie dajuć vychodzić za terytoryju» — kaža Miečysłaŭ Andrejevič.
Pa jaho słovach, u pałatach temperatura 18‑20 hradusaŭ, charčavańnie u miežach normy, na terytoryi balnicy ŭstalavanyja telefonnyja aparaty z vychadam na mižharodniuju suviaź, a taksama pracuje kamercyjny šapik. Sama balnica mieścicca ŭ chvojniku.
«Ale niekatorym chočacca kupić cyharetaŭ, piva i vina ŭ horadzie» — zaznačyŭ hałoŭurač.
***
20:15. Jak paviedamiŭ Siarhiej Voranaŭ, haładoŭščyki patrapili ŭ niaprostuju sytuacyju: jany nia mohuć doŭha trymać haładoŭku, bo ŭ takim stanie im nadzvyčaj škodna prymać leki. A ŭ svaju čarhu admova ad lekaŭ jość parušeńniem lekavaha pracesu, što moža paciahnuć za saboj pieravod u lakarniu začynienaha typu. Tam suchotnikaŭ buduć lačyć prymusova. «Nas užo pałochajuć takim pieravodam» — kaža jon.
Pavodle ŭdzielnikaŭ haładoŭki, vykładzienyja ŭ liście da kiraŭnictva RTB pretenzii padtrymali niekatoryja pradstaŭniki persanału balnicy, u pieršuju čarhu sanitary. Padpisanty lista vielmi spadziajucca na rozhałas ich akcyi ŭ ŚMI. Inakš prablemu zamnuć, pieravioŭšy niazhodnych pa inšych lakarniach, miarkujuć jany.
