Pieršymi padazronymi ŭ kryminalnaj spravie pa vybuchu 4 lipienia na Dni Respubliki stali Ihar Korsak i Mirasłaŭ Łazoŭski. Abodva niekali naležyli da Zhurtavańnia biełaruskich vajskoŭcaŭ, a achnyja siemja biaruć aktyŭny ŭdzieł u apazycyi.
Zatrymanyja prynamsi čaćviora byłych siabroŭ «Biełaha lehijonu». Hetaja arhanizacyja hurtavała moładź u 1990-ja, ale apošnija hady prypyniła dziejnaść.
Siarod zatrymanych supracoŭnikami KDB były lider «Biełaha lehijonu» Siarhiej Čysłaŭ, a taksama kolišnija siabry arhanizacyi Ihar Korsak, Mirasłaŭ Łazoŭski i Viktar Laščynski, jakija apošnim časam nia ŭdzielničali ŭ palityčnym žyćci.
Aryšty adbyvalisia pa adnolkavaj schiemie. Supracoŭniki KDB 8 lipienia pravodzili pieratrusy na kvaterach aktyvistaŭ, a taksama ich rodnych, paśla čaho advozili na dopyt u haradzkoje ŭpraŭleńnie, a ŭžo adtul źmiaščali ŭ śledčy izalatar na Akreścina (sprava ŭ tym, što Vaładarka ciapier na restaŭracyi). Svajakam abiacajuć, što zatrymanych źmiaścili ŭ turmu tolki na troje sutak, ale jak jano budzie nasamreč nichto nia viedaje.
Cikava, što padčas pieratrusaŭ z kvateraŭ ciahnuli ŭsio što možna. U Korsaka kanfiskavali pakunak z bałtami i hajkami, adny humovyja palčatki, chacia ŭ kvatery ich było našmat bolej, a taksama pakiety z-pad soku, jakija ciošča Ihara vykarystoŭvaje dla rasady. U Mirasłava Łazoŭskaha pa pratakole kanfiskacyi 31 najmieńnie — ad systemnaha bloku kamputaru da vizytovak. U siastry Siarhieja Čysłava zabrali staruju blašanku z-pad łaku.
Žoncy Mirasłava Łazoŭskaha dali spatkacca z mužam u śledčym adździele milicyi. Mirasłaŭ paśpieŭ pieradać tolki asabistyja rečy. Pahavaryć im nie dazvolili.
Maci Siarhieja Čysłava Halina kaža, što jaje pieratrus zaśpieŭ na leciščy. «Tam ničoha nie zabrali. Naprykancy ja zapytałasia, ci aryštavany Siarhiej. Mnie adkazali, što jon byŭ zatrymany, ale praź niejki čas adpuščany. Tamu ja była spakojnaja», — kaža Halina Čysłava.
A ŭžo ŭ sieradu a 13-j joj patelefanavała advakatka Apanasievič, jakaja i paviedamiła, što Siarhiej Čysłaŭ znachodzicca ŭ izalatary na Akreścina. Pavodle Haliny Čysłavaj, apošni čas jejny syn žyŭ i pracavaŭ u Maskvie, a ŭ Miensk pryjaždžaŭ časam tolki na vychodnyja da dziaŭčyny.
Ciešča Ihara Korsaka Taciana Ciaciorkina kaža, što 3 lipienia siamja znachodziłasia na leciščy. Viarnulisia jany ŭ Miensku tolki a dzieviataj viečara. «Na śviatkavańnie, naturalna, nichto nie chadziŭ», — kaža žančyna. Jak kaža žonka Ihara Volha Korsak, śledčym pa spravie jaje muža źjaŭlajecca kapitan SUPR HUUS Tanana A.V.
Što da zatrymańnia Viktara Laščynskaha, to tut pakul nijakaj jasnaści niama.
Usim aryštavanym u rajonie 35 hadoŭ. Vyhladaje na toje, što aryšt byłych siabroŭ «Biełaha lehijonu» analahičny haniebnamu źmiaščeńniu ŭ śledčy izalatar Paŭła Krasoŭskaha ŭ spravie viciebskich vybuchaŭ. Jość uražańnie, što meta hetych aryštaŭ – nia stolki pošuk bambista, kolki stvareńnie asacyjacyj miž terarystami i apazycyjaj.
Rodnyja aryštavanych trymajucca spakojna, ź ich nie ŭpadaje ŭ histeryju. U sieradu svajaki pieradali ŭ kameru svaim mužam i synam pieradačy. Heta ŭsio biełaruskamoŭnyja siemji. Ciešča Korsaka aktyŭnaja siabroŭka Kanservatyŭna-chryścijanskaj partyi BNF, a žonka Łazoŭskaha -- namieśnica staršyni MHA «Baćkaŭščyna» i byłaja pres-sakratarka Kazulina Nina Šydłoŭskaja. Maładyja pieravažna znajomilisia ŭ biełaruskich tusoŭkach.
Nina Šydłoŭskaja ŭ sieradu zmahła pieradać u kameru niekatoryja rečy. Pa našych źviestkach hetymi dniami supracoŭniki KDB i milicyi praviali pieratrusy na kvatetarach inšych siabroŭ užo nieisnujučaha «Biełaha lehijonu». Jość uražańnie, što meta hetych aryštaŭ – nia stolki pošuk bambista, kolki stvareńnie asacyjacyj miž terarystami i apazycyjaj.
