Skulpturnaja kampazicyja «Hukańnie viasny» na praśpiekcie Pieramožcaŭ (Mašerava) u Minsku. aŭtar - Aleś Šaternik
Pracy Šaternika - «Zvon Svabody» i doška ŭ honar Inbiełkultu
Vyjšaŭ albom-kniha mastaka i skulptara Alesia Šaternika «Soncakryž». Pad adnoj vokładkaj aŭtar «Zvona Svabody» i hukalščykaŭ viasny na praśpiekcie Pieramožcaŭ sabraŭ karciny, skulptury i litaraturnyja tvory.
U pieršym raździele knihi «Koler» prezientavanyja žyvapisnyja tvory. Piejzažy. Siužety — zbolšaha ŭlubiony Alesiem śviancianski i naračanski kraj (voziera Bałduk i vakolicy), što zredčas pierabivajucca vieniecyjanskimi i ńju-jorskimi krajavidami.
Raździeł «Forma» ŭklučaje zdymki skulptur i statuetak. Prahladajučy eskizy, dumajecca: ci nia nadta chutka biełaruskaja haradskaja skulptura pierajšła z sacrealistyčnych statuj Azhura na całkam sympatyčnych, ale zusim užo nieabciažaranych sensava «Kurca» i «Dziaŭčynku pad parasonam» Žbanava? Ci nie prapuściła cełaje złučvo — vyjavy viadomych postaciaŭ dasavieckaj historyi: Eŭrasińni Połackaj, Usiasłava Čaradzieja, Tadevuša Kaściuški. Eskizy pomnikaŭ užo zroblenyja Šaternikam. A pomnik džazmenu Edzi Rozneru pierad KZ «Minsk» na prykładu hladzieŭsia b darečy...
U trecim raździele «Słova», praciahvajučy tradycyju Drazdoviča i Šahała, Aleś Šaternik uvasablaje svaje impresii i tvorčyja pamknieńni nia tolki na pałatnie i ŭ bronzie, ale i na papiery. Tut — vieršy, uražańni, uspaminy.