Rasspažyŭnahlad i Ministerstva sielskaj haspadarki i charčavańnia Biełarusi padpisali ŭ Maskvie pratakoł pra pastaŭki małaka. U toj ža dzień pretenzii Biełarusi na 235 młn dalaraŭ vystaviŭ «Hazprom».
Kałaž NN.By
Rasijski spažyŭnahlad (Hienadź Aniščanka), Ministerstva achovy zdaroŭja (Vasil Žarko) i Ministerstva sielskaj haspadarki i charčavańnia Biełarusi (Siamion Šapira) padpisali ŭ Maskvie pratakoł, jaki zadavalniaje i biełaruski i rasijski bok.
Pra heta zajaviŭ u sieradu 17 červienia pa vynikach pieramovaŭ kiraŭnik Rassppažyŭnahladu Hienadź Aniščanka. Razmova viadziecca ab pratakole, što tyčycca chutkaha adnaŭleńnia pastavak biełaruskaha małaka ŭ Rasiju.
Pavodle H. Aniščanki, baki damovilisia «iści da realizacyi patrabavańniaŭ rasijskaha techničnaha rehłamienta na małako».
«Biełaruski bok u najbližejšy čas vykanaje ŭsie ŭmovy pa pryviadzieńni dakumientacyi na małako i małočnuju pradukcyju ŭ adpaviednaść z rasijskim zakanadaŭstvam», -- cytuje kiraŭnika Rasspažyŭnahladu Interfaks.
Kiraŭnik Minsielhascharču Biełarusi Siamion Šapira, u svaju čarhu, zajaviŭ, što ŭ najbližejšy čas Biełaruś adnović pastaŭki małočnaj pradukcyi ŭ Rasiju.
«U najbližejšy čas ruch małočnaj pradukcyi na rasijska-biełaruskaj miažy adnovicca», - skazaŭ Šapira pa vynikach pieramovaŭ z kiraŭnikom Rasspažyŭnahladu, paviedamlajuć RIA-Naviny.
Zakranajučy bałansy pastavak biełaruskaj małočnaj pradukcyi ŭ Rasiju, kiraŭnik Minsielhascharču paviedamiŭ,
što abjomy pastavak nie buduć źmienšany, a tolki skarektavana ich namienkłatura.
Nahadajem, što pieršuju zabaronu na pastaŭki biełaruskaj małočnaj pradukcyi ŭ Rasii Rasspažyŭnahlad uvioŭ 6 červienia.
Adnak nie paśpieła prasochnuć čarniła na damovie ab małace, jak «Hazprom» zapatrabavaŭ ad AAT «Biełtranshaz» likvidavać zapazyčanaść u sumie $230 młn za pastaŭleny ŭ studzieni—krasaviku haz,
paviedamiŭ ahienctvu «Interfaks‑Zachad» daradca pa ekanamičnych pytańniach pasolstva RF u Biełarusi Andrej Kuźniacoŭ.
«Hazprom» nakiravaŭ «Biełtranshazu» list z patrabavańniem pahasić zapazyčanaść za pastaŭki hazu ŭ studzieni — krasaviku.
Suma zapazyčanaści, biez uliku pieni i štrafu za niavybarku hazu ŭ praduhledžanym abjomie składaje krychu bolš za $230 młn», — skazaŭ A.Kuźniacoŭ, paviedamlaje radyjo Recha Maskvy. Miž tym u svoj čas premjer Rasii publična pahadziŭsia na toje, kab apłata za haz u pieršym kvartale išła pa siaredniehadavoj canie, a nie pa canie pieršaha kvartału. Cana ŭ studzieni-krasavika była vyšej siaredniehadavoj, bo cana hazu na jeŭrapiejskim rynku vyličvajecca ŭ zaležnaści ad cany nafty paŭhodu tamu. Biełaruś chacieła płacić pa siaredniehadavoj canie, kab faktyčna adterminavać častku płaciažu da kanca hodu. U krainie napačatku hodu naziraŭsia deficyt valuty. Varta nahadać, što «Hazprom» raniej išoŭ Biełarusi nasustrač: jon daterminova spłaciŭ za tranzit hazu na hety hod i vypłaciŭ hrošy za dolu akcyj «Biełtranshazu».
