Pry hipatetyčnym vybary miž abjadnańniem z Rasijaj i ŭstupleńniem u Jeŭraźviaz biełarusy ŭpieršyniu addali pieravahu zachodniamu varyjantu. Heta zaśviedčyła vieraśnioŭskaje nacyjanalnaje apytańnie, zładžanaje NISEPD.
Šmat hadoŭ sacyjołahi hetaj instytucyi ŭparta zadavali ŭ peŭnaj stupieni pravakacyjnaje pytańnie: «Kab daviałosia vybirać pamiž abjadnańniem z Rasijaj i ŭstupleńniem ŭ Jeŭrapiejski źviaz, što b vy vybrali?».
I na rasijskuju šalu zaŭždy kłałasia bolšaja dola hałasoŭ. U vieraśni ž sioleta 42,7% respandentaŭ vybrali Jeŭraźviaz, u toj čas jak uschodniuju susiedku — 38,3%.
Naturalna, u reale taki refierendum nievierahodny. Adnak zavostranaja alternatyva pakazalnaja. I jana adlustroŭvaje siońniašni hieapalityčny špahat Biełarusi.
Doŭhi čas na karyść rasijskaha viektaru pracavali i saŭkovaja spadčyna, i aficyjnaja prapahanda «bratniaj intehracyi», i strach pierad Zachadam, što padsiłkoŭvaŭsia toj samaj prapahandaj dy izalacyjaj.
I voś upieršyniu viektar hieapalityčnaj aryjentacyi biełarusaŭ nabyŭ zachodni kirunak.
Zadavali sacyjołahi i asobnaje pytańnie — užo biez razryvańnia mazhoŭ paspalitaha ludu dramatyčnaj alternatyvaj «Uschod — Zachad»:
«Kab zaraz u Biełarusi ładziŭsia refierendum z pytańniem, ci ŭstupać Biełarusi ŭ Jeŭrapiejski źviaz, jakim byŭ by vaš vybar?». Dyk voś, u hetakim razie «za» vykazalisia 44,1%, «suprać» — 32,8%. Jak bačym, jeŭrapiejcaŭ vyjaviłasia jašče bolej.
Trend ža za apošni hod i ŭvohule ŭražvaje. U vieraśni letaś pry adkazie na takoje ž pytańnie za ŭstupleńnie ŭ Jeŭraźviaz vykazalisia tolki 26,7% našych suajčyńnikaŭ.
Takim čynam, prajeŭrapiejskija nastroi ŭ biełaruskim hramadstvie za 12 miesiacaŭ vyraśli ledź ci nie ŭdvaja.
A sapraŭdnaja supraca ź Jeŭropaj, ličy, jašče i nie pačynałasia. Toje, što my honim tudy salarku, nie ličycca. Na hrošy Brusiel nie nadta pakul ščodry, ad kryzisu ratuje najpierš MVF. «Uschodniaje partniorstva» — na siońniašni dzień tolki na papiery.
Źmianiłasia ž atmaśfiera. Viecier pačaŭ dźmuć u inšy bok. Navat Łukašenka na apošniaj pres-kanfierencyi zajaviŭ rasijskim žurnalistam: chaču bačyć Biełaruś jeŭrapiejskaj krainaj!
Hieapalityčnaja alternatyva nabyvaje ŭ masavaj śviadomaści novyja rysy. Z adnaho boku, imidž uschodniaj susiedki stanovicca ŭsio mieniej pryvabnym. Znoŭ ža, i aficyjny kiraŭnik mižvoli pastaraŭsia, malujučy vobraz karumpavanaj, biazładnaj krainy z chcivaj i drapiežnaj viarchoŭkaj. Śpiać tam i bačać, jak padkłaści śvińniu siniavokaj respublicy. Błakujuć na miažy refryžeratary z małakom, kab skisła; truby cieraz Bałtyku kładuć, na šalonyja vydatki idučy, kab tolki jamčej było potym nas «nahnuć»… Nu, sami čuli, jaki vialiki rejestr roznych paskudstvaŭ.
Ź inšaha boku, amal syšła na ništo antyzachodniaja prapahanda. Jak bačym, kali nie pałochać narod rehularna «vierałomnym monstram» dy harotnaj dolaj polskaha (litoŭskaha) sielanina, dyk paspality lud chutka adychodzić ad roznych fobij-ksienafobij.
I jašče cikavy štrych. Łukašenka znoŭ — vy taksama čuli — tumanić pytańnie pra Abchaziju dy Paŭdniovuju Asieciju: maŭlaŭ, treba vyvučyć dumku narodu i ŭsio takoje. Na samaj spravie svaje daśledčyki peŭna ž nie adzin užo raz dakłali jamu pra «voks populi» ŭ hetym pytańni. Naŭrad ci tam vialikaja raźbiežka z vynikami vieraśnioŭskaha daśledavańnia NISEPD. A jany takija: 46,8% — za toje, kab Biełaruś pryznała dźvie kaŭkazskija respubliki, i tolki 12% — suprać. Uražvaje dola «pafihistaŭ» — až 40%.
Tym nie mieniej, salidnaja adnosnaja bolšaść — «za». Łukašenka pravodziŭ u žyćcio i značna mieniej papularnyja rašeńni.
I toje, što zaraz jon tak vykručvajecca — jaskravy simptom, što nadta ž nie chočacca psavać dačynieńni ź Jeŭraźviazam.
