Alaksandr Silvaška nie dažyŭ da 65-j hadaviny sustrečy ŭ Torhaŭ, što adbudziecca 25 krasavika.
Alaksandr Silvaška paciskaje ruku Uiljamu Robiertsanu. fota «Life».
Sustrelisia praz hady. A.Silvaška sprava, U.Robiertsan źleva
Fota z archiva A. Silvaški.
Adzin z apošnich zdymkaŭ Alaksandra Safronaviča. Fota Siarhieja Panamarova.
26 studzienia 2010 h. pajšoŭ z žyćcia adzin z apošnich udzielnikaŭ histaryčnaj sustrečy na Elbie 87-hadovy Alaksandr Silvaška. Heta jon u dalokim 1945-m pacisnuŭ ruku amierykanskamu lejtenantu Uiljamu Robiertsanu ŭ časie karotkaj i chvalujučaj sustrečy savieckich i amierykanskich vojskaŭ. Dakumientalnyja kadry histaryčnaha vitańnia dvuch lejtenantaŭ, zroblenyja karespandentam amierykanskaha časopisa «Life», stali suśvietnaj kłasikaj dakumientalistyki časoŭ Druhoj suśvietnaj. U 2005 hodzie Alaksandr Safronavič pryniaŭ udzieł va ŭračystaściach u honar 60-hodździa histaryčnaj sustrečy sajuźnikaŭ. U prysutnaści 10 tysiač hledačoŭ byli rekanstrujavanyja padziei krasavika 1945 hoda. Uradženiec Kleččyny i hanarovy hramadzianin horada Torhaŭ byŭ adnym ź niešmatlikich žyvych śviedak tych padziejaŭ. Jahony amierykanski kaleha pa Elbie Uiljam Robiertsan pamior u 1999 hodzie. U 2005 h. Alaksandr Silvaška jašče raz staŭ hierojem mnohich repartažaŭ suśvietnych ŚMI.
Reštu žyćcia vieteran pražyŭ u vioscy Morač Kleckaha rajonu. Horad Torhaŭ vypłačvaŭ jamu hrašovuju dapamohu. Štohod Alaksandra Safronaviča zaprašali ŭ Hiermaniju na tradycyjnyja krasavickija sustrečy na Elbie. Letaś čarhovaja pajezdka apynułasia pad pahrozaj: miedyki pryznali stan jaho zdaroŭja zdavalniajučym i nie rekamiendavali jechać u Niamieččynu. Biełaruskaje Ministerstva abarony nibyta dasłała adpaviedny list u niamieckuju ambasadu, paviedamlała ŭ sakaviku 2009 hoda Radyjo Svaboda. U Morač vyjechali žurnalisty, kab razabracca na miescy, ale byli zatrymanyja ŭ Klecku. Adźniatyja videamateryjały hutarki ź vieteranam byli kanfiskavanyja, paviedamlaje błoh Siarhieja Panamarova.
Raźvitańnie z Alaksandram Safronavičam prajšło ŭ vioscy Kołki, što pa susiedstvie z Moračču. Jon budzie pachavany ŭ Minsku pobač z žonkaj.
