U Breście 16 sakavika adbyłosia raźvitańnie z turystami, jakija zahinuli ŭ Murmanskaj vobłaści Rasii, — Dar`iaj Tracynskaj, Alaksandraj Koŭhan, Michaiłam Karpiašom i Jaŭhienam Traskievičam. Ich cieły byli dastaŭleny napiaredadni viečaram u śpiecvahonie chutkaha ciahnika «Minsk — Brest».
Dvuchhadzinnaje žałobnaje mierapryjemstva prajšło ŭ Ladovym pałacy, u faje jakoha byli ŭstanoŭleny truny ź ciełami. Sotni ludziej pryjšli raźvitacca z maładymi ludźmi. U cyrymonii ŭziali ŭdzieł kiraŭniki Bresckaj vobłaści i Bresta.
Paśla hetaha adbyłosia adpiavańnie zahinułych u Śviata‑Vaskrasienskim sabory‑pomniku ŭ honar 50‑hodździa Pieramohi ŭ Vialikaj Ajčynnaj vajnie.
Zatym cieły turystaŭ byli pieraviezieny da miescaŭ pachavańnia.
Jany buduć pachavany 16 i 17 sakavika na roznych mohiłkach: Dar`ia Tracynskaja — u vioscy Bulkava Žabinkaŭskaha rajona, Alaksandra Koŭhan — u Kobrynskim rajonie, Michaił Karpieš — u vioscy Černi Bresckaha rajona, Jaŭhien Traskievič — u Słonimskim rajonie Hrodzienskaj vobłaści.
U spačuvańni ad imia staršyni Bresckaha abłvykankama Kanstancina Sumara, apublikavanym u haziecie «Briestskaja zaria», havorycca, što z hibiellu hetych čatyroch maładych ludziej «Brestčyna straciła tuju častku svajoj moładzi, jakaja simvalizuje paryŭ da novaha, biasstrašnaść i imknieńnie vyprabavać siabie».
Trahiedyja zdaryłasia 8 sakavika ŭ Łavazierskim rajonie Murmanskaj vobłaści, na pieravale Tavajok na adlehłaści 26 km ad pasiołka Reŭda.
Śniežnaja łavina nakryła šaściarych biełaruskich turystaŭ. Dvum ź ich, Alaksandru Jurahu i Dźmitryju Faminu, udałosia vyratavacca. Viečaram 9 sakavika jany dabralisia da ludziej i paviedamili pra zdareńnie. Čatyry turysty — Michaił Karpieš (1981 hoda naradžeńnia), Jaŭhien Traskievič (1986), Dar`ia Tracynskaja (1983) i Alaksandra Koŭhan (1987) — zahinuli.
12 sakavika ź inicyjatyvy bresckich turystaŭ byŭ adkryty dabračynny rachunak dla akazańnia dapamohi rodnym zahinułych u Murmanskaj vobłaści: raźlikovy rachunak № 3819382105438 u filijale № 126 AAT «AAB «Biełarusbank» horada Bresta, MFA 252, dabračynny rachunak № 000 000 030 z pamietkaj «Na akazańnie dapamohi rodnym turystaŭ, jakija trapili ŭ katastrofu ŭ harach Kolskaha paŭvostrava».