Chto zabiŭ terarystak? 118

Jany prosta nie zachacieli padstavić «levaj ščaki». I voś vynik. Novy błoh na NN — piša br. Piotra Rudkoŭski.

Zaŭždy niajomka siabie adčuvaju, kali pačynaju pisać čornym pa čyrvonym. To bok, pisać na kryvi…

Ad vybuchu na stancyjach «Łubianka» i «Park Kultury» prajšło ŭžo niekalkinaccać hadzin, prahučała mnostva spačuvalnych słoŭ i asudžalnych usklikaŭ. Vierniki molacca i ślozna ŭzdychajuć, pravadyry trasuć kułakami, radykał-patryjoty kačajuć muskuły, bol i adčaj źmiešvajucca ź nianaviściu i žadobaj pomsty.

Chto zabiŭ terarystak? — takoje nietypovaje pytańnie chaču pastavić z hetaj nahody. Ci lepš: što ich zabiła?

Śmierć hetych 38 (vodle stanu na momant pisańnia hetych radkoŭ) nastupiła paśla śmierci tych 2, jakija ździejśnili zamazabojčy terakt. Ale hetaja śmierć u ich vypadku pavinna była nastupić značna raniej. Pavinna było być niešta, što źniščyła ŭ ich žyćcio, zabiła žadańnie žyć i lubić. Chto albo što ich zabiła? Dzie biare pačatak hety žudasny virus śmierci-ŭ-imia-nianaviści? I ci jość antydotum?

Pakińma ŭbaku prablemu pačatkaŭ. Što tyčycca antydotuma — jon jość. Niekatoryja prezientujuć jaho pad firmovaj markaj INRI*, ale paznačyć varta, što jon nikoli nie byŭ apatentavany, tamu kožny moža zajmacca jaho pradukcyjaj i karystacca biez usiakich abmiežavańniaŭ. Śmierć Isusa Nazarejskaha na kryžy. Śmierć, jakaja źniščaje śmierć. Śmierć-u-imia-lubovi.

Što takoje śmierć-u-imia-lubovi? Aznačaje jana źniščeńnie ŭnutry siabie asiarodkaŭ zła i nianaviści. Byvajuć situacyi, kali vyzvaleńnie ad nianaviści źjaŭlajecca ciažejšym, čym fizičnaja śmierć. Ja nie viedaju bijahrafij tych asob, jakija ździejśnili terakty ŭ Maskvie. Ale viedaju, što mnohija žančyny ŭ Čačni zhubili svaich mužoŭ i synoŭ, što byli nieadnarazova hvałčany i prynižanyja «pa zakonach vajny», što, budučy zhvałčanyja «voraham», stanoviacca taksama adkidami ŭ svaich supolnaściach. Stanoviacca žyvymi zabitymi. Pierakanany, što siońniašnija «hieraini teroru» naležali da hetaj katehoryi žančyn.

Jak źniščyć u sabie pulsujučuju nianaviść u takoj situacyi? Vyzvalicca ad hetaj nianaviści i sapraŭdy moža być ciažej za fizičnuju śmierć. Adnak heta mahčyma, kali jość u dušy viera ŭ siłu lubovi. A kali jość suviaź z Tym-Chto-Źniščyŭ-Śmierć (majecca na ŭvazie śmierć-nianaviść), to mahčymaje stanovicca realnym…

Niekatoryja śmiajucca, čujučy jevanhieličnyja słovy «Kali chtoś udaryć ciabie ŭ pravuju ščaku, padstaŭ jamu i levuju». Tyja, chto lehkadumna pakieplivajuć z hetych słoŭ, chaj usurjoz padumajuć, što było hłybinnaj pryčynaj hetaha (i nie tolki) teraktu. Padumajcie, šanoŭnyja. Tak, siońniašnija terarystki ničoha asablivaha nie zrabili. Jany atrymali spaŭna ŭ pravuju ščaku i skazali: chopić.

* Rasšyfroŭvajecca heta, badaj, tak: Iesus Nazarenus Rex Iudaicus.

0

0

0

0

0

0

Br. Piotra Rudkoŭski

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH