U sieradu ŭranku u abłasnym adździele pa baraćbie z arhanizavanaj złačynnaściu prajšoŭ dopyt moładzievaha aktyvista z Žodzina Paŭła Krasoŭskaha. Paŭłu skazali, što jon padobny da fatarobatu hałoŭnaha padozranaha ŭ spravie letašnich viciebskich vybuchaŭ. Paśla niepraciahłaha ŭ časie dopytu cupracoŭniki pravaachoŭnych orhanaŭ učynili pieratrus na kvatery ŭ Paŭła. Pavodle jahonych słovaŭ, byli kanfiskavanaja roznaja drukavanaja pradukcyja, staryja hazety, kamputarny systemny blok, a taksama dyski.
Paśla Krasoŭskaha advieźli milicejskaj mašynaj u Viciebsk, dzie ŭručyli nazaŭtra a 9:00 pozvu na dopyt u prakuraturu. U jakoj jakaści, nie paviedamili. Za kraty Paŭła ŭ sieradu nie pasadzili.
U čaćvier dopyt Krasoŭskaha doŭžyŭsia blizka vaśmi hadzinaŭ. Paśla čaho była začytanaja pastanova, pavodle jakoj Pavał musić być zatrymany jak padozrany pavodle artykułu «zamach na zabojstva dvoch i bolej asob, ździejśnieny ahulnaniebiaśpiečnym čynam» (art.14, p.1 i 5 č.2 art.139 Kryminalnaha kodeksu). Ciapier Krasoŭski znachodzicca ŭ izalatary časovaha ŭtrymańnia. Nastupny dopyt maniacca pravieści ŭ aŭtorak.
Pavodle dadzienaha artykułu, Paŭłu jak najbolej moža pahražać pažyćciovaje albo śmiarotnaje pakarańnie. Varta adznačyć, što ŭ dni vybuchaŭ 14 i 22 vieraśnia 2005 h. Krasoŭski nia byŭ u Biełarusi.
Pavał Krasoŭski – adzin z najbolš charyzmatyčnych moładzievych lideraŭ, viadomy daloka za miežami svajho Žodzina. Jon zajmieŭ viadomaść paśla haładoŭki pratestu letaś suprać vydaleńnia maładzionaŭ z navučalnych ustanovaŭ z palityčnych pryčynaŭ. U Paŭła chutka musić źjavicca dzicia.
Nahadajem, što sioleta na Krasoŭskaha ŭžo była zaviedziena kryminalnaja sprava za abrazu honaru i hodnaści čynoŭnika z Žodzinskaha harvykankamu, ale paśla jana była prypynienaja.
