Siońnia ŭ Miensku adbyłosia pašyranaje pasiedžańnie Palitrady abjadnanych demakratyčnych siłaŭ — udzielničali pradstaŭniki Rady biełaruskaj intelihiencyi i Asamblei niaŭradavych arhanizacyjaŭ. Abmiarkoŭvali dačynieńni z hramadzkimi arhanizacyjami j prapanovu staršyni Partyi BNF Vincuka Viačorki «Kampramis dziela adzinstva».
Siońnia ŭ Miensku adbyłosia pašyranaje pasiedžańnie Palitrady abjadnanych demakratyčnych siłaŭ — udzielničali pradstaŭniki Rady biełaruskaj intelihiencyi i Asamblei niaŭradavych arhanizacyjaŭ. Abmiarkoŭvali dačynieńni z hramadzkimi arhanizacyjami j prapanovu staršyni Partyi BNF Vincuka Viačorki «Kampramis dziela adzinstva».
Na palitradzie abmierkavali prapanovu staršyni Partyi BNF Vincuka Viačorki «Kampramis dziela adzinstva». Nahadajem, Alaksandar Milinkievič admoviŭsia ad udziełu ŭ sakavickim Kanhresie demsiłaŭ. Milinkievič miarkuje, što taki Kanhres pryviadzie da raźjadnańnia apazycyi.
Paśla hetaha staršynia Partyi BNF spadar Viačorka zaklikaŭ Alaksandra Milinkieviča i lideraŭ demakratyčnych partyjaŭ padpisać da 25 lutaha damovu pad nazvaj «Kampramis dziela adzinstva». Pavodle spadara Viačorki, heta dazvolić zachavać adzinstva i efektyŭna vykarystać patencyjał Alaksandra Milinkieviča.
Lider Partyi BNF prapanuje pravieści čarhovy Kanhres demakratyčnych siłaŭ sioleta ŭ traŭni j abrać staršyniom Palityčnaj rady Alaksandra Milinkieviča. Spadar Viačorka hetak padsumaŭ vyniki dyskusii:
Viačorka: «Dla mianie heta jakraz vynikovaje pasiedžańnie. Nichto nie adkinuŭ našych prapanovaŭ, našaha prajektu «Kampramis dziela adzinstva». Pryčym heta tyčycca jak siabroŭ palitrady, lideraŭ partyjaŭ, Milinkieviča, tak i siońniašnich haściej pasiedžańnia, pradstaŭnikoŭ hramadzkaha sektaru j intelihiencyi, mnohija ź jakich vykazvalisia ŭ tym ža samym klučy. Ja spadziajusia, što ŭ čaćvier na pasiedžańni sapraŭdy ŭdasca dajści da niejkaha kampramisu — kali, zrazumieła, na toje budzie zhoda inšych udzielnikaŭ. Nu, i važna toje, što siońniašniaje pasiedžańnie adbyvałasia pad pilnym vokam bujnych hramadzkich arhanizacyjaŭ i aŭtarytetnych dla luboha biełarusa ludziej».
Staršynia palitrady Alaksandar Milinkievič zajaviŭ:
Milinkievič: «Siabry palitrady na svaich pazycyjach — nichto nie źmianiaje. Ale ja liču, što vielmi važna, što adbylisia hramadzkija čytańni. Pryjšła hramadzkaść, pavažanyja ludzi, i nam vielmi važna pačuć ich dumku. Dumaju, što vychad z kryzysu całkam mahčymy, kali bolšaść budzie kanstruktyŭna padychodzić da kryzysu. Nu pabačym — ja dumaju, što ŭ čaćvier pasiedžańnie mahčymaje. Ale na taki kanhres, jaki siońnia padrychtavany, na jakim nia budzie abiracca adziny lider, na jakim nia vyznačanyja mety j vielmi vialiki niedavier adnych da druhich paśla zboru podpisaŭ, ja liču, prosta nia varta iści. My pasvarymsia jašče bolš. Kanhres patrebny dla kansalidacyi. Siońnia takoj kansalidacyi nie adbudziecca. Navat na našaj naradzie niama adzinstva. A my pavinny pryjści tudy z adzinaj dumkaj i pazycyjaj».
Karespandent: «Jak vy staviciesia da prapanovy spadara Viačorki? Ci moža heta być asnovaj dla kampramisu?»
Milinkievič: «Dobraja prapanova, kanstruktyŭnaja, i ja taksama kanstruktyŭny čałaviek. I ja liču, što mnohaje, što tam prapanujecca, prymalna. Heta treba dyskutavać, i vielmi važna, kab byŭ kansensus u palitradzie. Ja nia dumaju, što kanhres pavinien kahości łamać praz kalena».
Nahadajem, što Rada biełaruskaj intelihiencyi vystupiła z zajavaj z nahody padziejaŭ vakoł Kanhresu demsiłaŭ. Zajava zaklikaje abjadnacca ŭdzielnikaŭ demakratyčnaha ruchu.
