Chviedar Kažanievič pamior 27 lutaha 2007 h. u Mančestary, paviedamlaje hazeta "Biełarus".
Ch. Kažanievič naradziŭsia 14 lutaha 1925 h. u Lubielpali (ciapier Lubiel) na Pinščynie ŭ šlachieckaj siamji. U 1940 h. siamju Kažanievičaŭ represavali balšaviki i vyvieźli ŭ Sibir. U 1942 h. 17‑hadovy Chviedar zapisaŭsia ŭ Polski korpus (armiju Ŭładzisłava Andersa), dałučanym paźniej da brytanskaj armii. Prajšoŭ Iran, Palestynu, Italiju.
Braŭ udzieł u znakamitaj bitvie ź niemcami pad Monte‑Kasina ŭ traŭni 1944 h. Hetuju bitvu apisaŭ u apovieści «Śmierć i sałaŭi» Piotra Syč. Straty Polskaha korpusu pry šturmie klaštara Monte-Kasina byli niemałyja: 924 čałavieki zabityja, 94 źnikli biaź viestak. Siarod ich — 180 naradžencaŭ Biełarusi. Za ŭdzieł u bitvie Chviedar Kažanievič byŭ uznaharodžany pamiatnym kryžam.
U 1946 h. razam z Korpusam Chviedar Kažanievič byŭ evakuavany ŭ Anhliju, mabilizavaŭsia. Niekatory čas žyŭ u Bredfardzie (Jorkšajr), a potym pierajechaŭ u Mančester, dzie pracavaŭ inspektaram transpartu.
Chviedar Kažanievič braŭ udzieł u stvareńni Zhurtavańnia biełarusaŭ u Vialikabrytanii (1947), zajmaŭ pasadu staršyni jaho mančestarskaha adździełu. Uvachodziŭ va ŭpravu Biełaruskaj aŭtakiefalnaj pravasłaŭnaj carkvy ŭ Vialikabrytanii, byŭ radnym BNR. Słovam, na jahonych plačach trymałasia biełaruskaje žyćcio ŭ hrafstvie Łankšajr.
