19 maja rektar Haradzienskaha dziaržaŭnaha ahrarnaha ŭniversytetu i deputat Savietu respubliki Vitold Pieścis na kancercie «Za kvitniejučuju Biełaruś» u Horadni vystupiŭ ź inicyjatyvaj stvareńnia pa ŭsioj krainie piarvičnych arhanizacyjaŭ hramadzkaha abjadnańnia «Biełaja Ruś».
U interviju hazecie «Respublika» Vitald Pieścis zajaviŭ: «Biełaja Ruś» stała mocnaj žyćciazdolnaj arhanizacyjaj, jakaja na spravie źjaŭlajecca aporaj prezydentu RB. My znajšli hodnaje miesca ŭ hramadzka‑palityčnym žyćci vobłaści, pryznańnie i padtrymku nasielnictva. U hetaj sytuacyi nieabchodna naroščvać patencyjał udziełu «Biełaj Rusi» ŭ rašeńni ahulnadziaržaŭnych zadač».
Prykładna z taho samaha času «piarvički» arhanizacyi pačali ŭtvaracca pa ŭsioj krainie. Źjaviłasia infarmacyja i pra toje, što bližejšym časam u stalicy maje prajści ahulnarespublikanski źjezd «Biełaj Rusi». Padboram delehataŭ na źjezd zajmajucca idealahičnyja adździeły rajvykankamaŭ.
Ustanoŭčyja schody «Biełaj Rusi» prajšli ŭ Voršy, Biešankovičach, Barysavie, Krupkach, Haradku, inšych haradach. Pryčym usia praca pa stvareńni respublikanskaha abjadnańnia supravadžajecca istotnaj infarmacyjnaj padtrymkaj biełaruskich telekanałaŭ, dziaržaŭnych drukavanych i elektronnych ŚMI.
5 červienia stała viadoma, što za stvareńnie ŭ ich rehijonie arhanizacyi «Biełaja Ruś» vystupili 15 žycharoŭ Homielščyny .
Hramadzkaje abjadnańnie «Biełaja Ruś» była stvoranaje ŭ lipieni 2004 hodu ŭ Horadni z metaj «padtrymki palityčnaha kursu krainy, abjadnańnia prahresiŭnych siłaŭ hramadztva na asnovie idealohii biełaruskaj dziaržavy».
Pavodle aficyjnaj infarmacyi siońnia «Biełaja Ruś» naličvaje 12 tysiač siabroŭ arhanizacyi, a taksama amal 800 «piarvičak» pa vobłaści. Pałova deputataŭ abranych sioleta na miascovych vybarach na Haradzienščynie źjaŭlajucca siabrami «Biełaj Rusi».
Praktyčna pa tym samym scenary niekali stvarałasia moładzievaja dziaržaŭnaja arhanizacyja BRSM. Vyhladaje, što ciapier ułady vyrašyli stvaryć ahulnarespublikanskuju arhanizacyju i dla bolš stałych hramadzianaŭ.
