Siońnia ŭ karotkaj pramovie na vajskovym paradzie na Dni niezaležnaści A.Łukašenka skancentravaŭsia na pytańniach biaśpieki krainy i pahrozach.
Jon adznačyŭ: «My vysoka cenim uniosak kožnaj krainy kaalicyi ŭ pieramozie nad fašyzmam. Zdavałasia, što hety ŭrok prymusić usich palitykaŭ pomnić pra vyniki vajny, adnak takoha nie adbyvajecca».
Łukašenka ŭspomniŭ pra pašyreńnie infastruktury NATO na Ŭschod, a taksama pra ŭstalavańnie amerykanskich systemaŭ supraćrakietnaj abarony ŭ susiednich ź Biełaruśsiu dziaržavami. Heta ŭsio, na dumku kiraŭnika dziaržavy, adbyvajecca «pry maŭčańni eŭrapiejskich demakratyčnych krain».
«Adnabakovaje razbrajeńnie niemahčymaje», – kaža Łukašenka. Paśla dadaje pra toje, što niahledziačy na ekanamičnyja ciažkaści ŭ adnosinach z Rasiejaj, raniejšym zastajecca kurs na sajuznaje budaŭnictva i biełaruski bok budzie praciahvać baranić miežy sajuznaj dziaržavy.
Paśla Łukašenka spyniŭsia na pahrozach dla biełaruskaj niezaležnaści. Siarod najbolš značnych pahrozaŭ «infarmacyjnaja ekspansija, palityčny šantaž, sankcyi, ekanamičnyja ryčahi ŭpłyvu, usie hetyja metady ŭžyvajucca suprać krainaŭ, jakija pravodziać niezaležnuju palityku».
Svaju pramovu Łukašenka skončyŭ słovami: «Niachaj zaŭsiody budzie mirnaje nieba».
