Marjana Hruździłovič. Fota Julii Daraškievič
25 sakavika ź filii brytanskaha adukacyjnaha centru «SOL Minsk» była zvolnienaja nastaŭnica anhielskaj movy Marjana Hruździłovič.Pavodle kiraŭnictva ŭstanovy, za sistematyčnaje parušeńnie pracoŭnaha zakanadaŭstva. Sama Marjana Ryhoraŭna ličyć, što zvalnieńnie źviazanaje ź jaje pohladami.
25 sakavika da žančyny prosta padčas zaniatkaŭ pryjšli pradstaŭniki administracyi kampanii SOL. Jany paprasili nastaŭnicu dać dzieciam samastojnaje zadańnie, a samoj vyjści dla niejkaj važnaj razmovy. Sprava ŭ tym, što spadaryni Hruździłovič 20 krasavika spaŭniajecca 50 hadoŭ, jana rychtavałasia adznačać hety dzień, tamu spačatku padumała, što heta niešta źviazanaje z padrychtoŭkaj da jubileju.
«Ja takaja ŭsia zadavolenaja pabiehła, schapiła zaprašeńni na śviatkavańnie. Ale havorka pajšła zusim nie pra heta. Jany skazali, što napiaredadni, 24 sakavika, u mianie byŭ kanflikt na zaniatku i ŭ Frunzienski adździeł adukacyi pastupiła zajava, padpisanaja, hrupaj baćkoŭ, sa skarhaj, što na ŭrokach viadziecca palityčnaja ahitacyja, a taksama cisk na psichiku dziaciej. Ja ŭspomniła, što sapraŭdy ŭčora adna dziaŭčynka vielmi niehatyŭna vykazałasia pra Dzień Voli. Heta kali znoŭ źbiarucca tupyja ŭrody z apazicyi i buduć niešta kryčać, skazała jana. Z majho boku nijakaha apoviedu pra Dzień Voli nie było. Prosta zapytałasia, navošta ty tak kažaš, kali tam nie byvaješ? A ja chadžu tudy. I chodziać tudy intelihientnyja, charošyja, mirnyja ludzi. Ja skazała, što hanarusia, što ŭ nas u krainie jość takija ludzi. Na hetym urok praciahnuŭsia, ale ja bačyła, što dziaŭčyna pakryŭdziłasia», ‑‑ kaža M.Hruździłovič.
Marjanie Ryhoraŭna adrazu zajavili, što jana padstaviła ŭsiu kampaniju, tamu jany «vymušanyja pryniać adpaviednyja miery». Heta značyć, skasavać pracoŭnuju damovu ŭ metach vyratavańnia kampanii.Pryčym, zvalnieńnie adbyłosia imhnienna. Spn.Hruździłovič jašče zapytałasia, jakija mienavita dzieci paskardzilisia svaim baćkam, ale pradstaŭniki administracyi adkazali, što sami nie bačyli hetaha lista. Nastaŭnica potym jašče skončyła svoj apošni zaniatak u SOL.
Spadarynia Hruździłovič źviartaje ŭvahu, nakolki chutka byli sabranyja podpisy - kali tyja podpisy — nasamreč praŭda.Isnavańnie tych podpisaŭ vyklikaje mocny sumnieŭ. «Viečaram 24‑ha ja praviała toj zaniatak, a na ranicu nastupnaha dnia była składzienaja «kalektyŭnaja» skarha na mianie. Zavuč potym u pryvatnaj razmovie skazała, što tata ŭ dziaŭčynki ‑‑ pałkoŭnik MUS».
Sama
Marjana Hruździłovič naradziłasia ŭ Rasii, dzie advučyłasia da piataha kłasa, potym žyła ŭ Breście, dzie była vyzvalenaja ad vyvučeńnia biełaruskaj movy. Tym nie mienš, žančyna padtrymlivaje demakratyčny ruch, chodzić na akcyi apazicyi.Voś tolki sioleta praz hetyja prablemy na pracy nie zmahła trapić na Dzień Voli.
«Ciapier
kiraŭnictva kaža, nibyta jany viedali ad samaha pačatku, što ja ŭ šerahach BNF, i zapluščvali na heta vočy,ale heta poŭnaje tryźnieńnie, bo ni ŭ jakich partyjach ja nikoli nie była. Jany nie mohuć pavieryć, što ja chadžu na mitynhi nie pa raznaradcy, a ad pokliču dušy», ‑‑ kaža nastaŭnica.
Potym
spn.Marjana pačynaje pakazvać fotaalbom, jaki rychtavała da piacidziesiacihodździa, i jaki pavinny byli ŭbačyć kalehi i načalstva. U albomie, tym liku, zdymki z vuličnych akcyj.«Ja nikoli nie chavała svajoj pazicyi. Voś vy bačycie Dzień Voli 2007 hodu, prajšłasia pobač ź Milinkievičam ad kinateatru «Maskva» da Akademii navuk. I hetym vielmi hanarusia». Potym demanstruje staronki, pryśviečanyja svajoj pracy.
Kampanija SOL u Minsku adkryłasia 17 žniŭnia 1998 hodu i Marjana Hruździłovič ad pieršych dzion pačała svaju pracu tam. «Mnohija tady pabajalisia adrazu pajści ŭ štat, pracavali na paŭstaŭki. A ja taki čałaviek, što mahu być addanaja tolki čamuści adnamu. Dyrektar kampanii praz heta zaŭsiody staviła mianie ŭ prykład, bo ja nie pabajałasia pryjści ŭ čas, kali kampanija jašče nie stajała krepka na nahach».
Praź niejki čas kampanija adkryła filiju, u SŠ №212, pobač z domam nastaŭnicy.
Pa kamientar adnosna zvalnieńnia Marjany Hruździłovič my źviarnulisia da dyrektarki filii Vandy Darmajan. Ceły dzień jana była niedastupnaja dla kamientaroŭ i tolki pad viečar adkazała na našy pytańni praz telefon:
«Vykładčyca była zvolnienaja za sistematyčnaje parušeńnie pracoŭnaha zakanadaŭstva.Byvali vypadki, što jana davodziła dziaciej da niervovych zryvaŭ, abražała. Heta chłuśnia, što jaje zvolnili za palityku. Byvali vypadki, što jana admianiała zaniatki, nie ŭzhadniŭšy z kiraŭnictvam», ‑‑ kaža V.Darmajan.
«Nie było nijakich skarhaŭ! – pratestuje nastaŭnica. ‑‑ Heta išoŭ adzinaccaty hod majoj pracy, ale ničoha padobnaha nikoli nie było. Dzieci mianie lubiać, ja ich taksama lublu, rabotu lublu. Zachodžu ŭ internet, pampuju zdymki, razdrukoŭvaju, prynošu im. Moj muž časam kaža, što jeści nie zhatavana, a ja siadžu i niešta vyrazaju dla dziaciej, rychtujusia da zaniatkaŭ. Kab im cikava było, kab chacieli chadzić», ‑‑ adkazvaje na hetyja zakidy zvolnienaja.
Dzieciam spn.Marjana ničoha nie kazała pra zvalnieńnie. Z kaleh patelefanavali dvoje, kab vykazać svaju padtrymku. Što praŭda, u paniadziełak pryznačany zbor kalektyvu, jaŭka abaviazkovaja dla ŭsich.
Cikaŭlusia, ci jość spadziavańni, što na pracy mohuć adnavić i ci choča žančyna sama hetaha paśla takoha vypadku. «Ja dumaju, što nie adnoviać na pracy. Pakul nie płanuju padavać u sud. Česna kažučy, nie viedaju, što budu rabić. Mnie vielmi škada dziaciej, u mianie sioleta šeść hrup. Ja z usimi znachodžu supolnuju movu. Ja ŭ hetym centry šmat razoŭ viała zaniatki i ŭ darosłych. My vielmi siabravali. Voś adna maładaja žančyna niadaŭna źjechała ŭ Amieryku, dyk telefanavała. Ja dumała, što joj niešta patrebna, ale telefanavała parazmaŭlać. Voś hetaha mnie škada, ja sapraŭdnaja nastaŭnica».
Marjana Hruździłovič raskazvaje, što
letaś, kali adznačałasia 10‑hodździe SOL Minsk, kiraŭnictva kampanii ŭznaharodziła nastaŭnicu padarožžam na dvaich u Paryž na vosiem dzion. «Uznaharodzili za maju pracu, za viernaść, za addanaść kampanii. Kali b ja štości parušała, dy jašče sistematyčna, dyk ci zrabili b taki darahi padarunak?».
U toj samy dzień, kali stała viadoma pra zvalnieńnie Marjany Hruździłovič, ludzi pačali nakiroŭvać dziesiatki elektronnych listoŭ u minskuju filiju kampanii, a taksama ŭłasna ŭ Vialikabrytaniju z patrabavańniem adnavić žančynu na pracy.
Za časy kiravańnia Łukašenki zvalnieńni ludziej z pracy za palityčnyja pohlady, pa ŭkazcy KDB, stali vielmi raspaŭsiudžanaj źjavaj.
